وشكون يهضر.....
احمد انعنيعة
هاذ الشي كثير....
اثر علي على حالتي..
كيفاش....
بعد هذا العمر كله...
هاذ العمر الطويل..
تتمد لي كاس صغير..
هاذ الشي حزين...والله الى حزين...
زمان كنت تنعس بلا سرير..
ونشرب الماء الجاري..
وخا ها كذاك كان وادي ازرق صافي..
وكنت تنطحن زرع المطمورة بالمد الكافي..
اييه...راه انت وليتي تتخوخ ثماري بلا شواري...
هاذ القول معروف....ومعروف
ولا عيب على اللي اتلف وولى يهضر في الزناقي
يا الجن ...يا اللي من ضلوعي طالع
راه اللي تشرع ما تفرق
وحلم الاوهام ما تحقق
الاستعمار باق على الورق
كون فايق..كون عايق
عنداك يدقوك دقان الدقايق
هاذ الزمان ما يحتاج كذوب
راه انا قلبي في الحشمة ذايب
واش الطين مع الزفت تيتعانق
ايه...كل ليلة القصاير دايرة
زماني ما دتيها فيه...
بالنهار تظل تدور
تتجمع في الفلوس باش يسكروا الطيور
وانا ذباني يبات ناعس..
جالس ...وفي الظلام يقلب في عينيه..
ارقص وزيد ارقص...وعلق السجاير
شحال انا طلبتك الى وقفت شمسي تساعدني
لكن انت ...بالقيل والقال افضحتيني
طربتيني طرب الغريب وانا هكذا مصور
شحال قبلت منك الدعوة باش نعرف شيطانك شحال في جهالته طاير
وانت ناو انا نعطيك سواكي ونزيدك اشهيوات القصاير
ولكن دابا تعرف
راها طارت الحشمة وزال الخوف
ها انا باري عليك...انا باري
قر....ابا...غير كر...واش تغريتي...
شفت عناق الناس مايلة قلت راهم سيكلوا الحريرة طايلة
اييييه...انا تنغمس في الروز بزوج يدين
بلا معالق ...وشكون يهضر
راه شحال كنت تنخاف من واحد ثقيل..
بحالك..وانا عارف العدو ما يغفل
وما يتقدم حتى يثيق..
دايما ساد بابو المتين وبمالو محصن
ينقث ويزيد في الايام...يوم على يوم
ينقص من الرشد ويزيد في الظلم
ولكن احسن ليك تعتزل...او تقسم
راه للثوبة كنز ثمين
والعز في الارض باقي طويل
واللي تعداوا عليه واعيا ما يشك يراه لابد ينتقم
