الدنيا ضلمة من بولاق للزمالك
مين اللي أوحى للجمال يختشي
مين اللي أوحى للجمال يختشي
ده انا لسة شايف عم جاد عقبالِك
جايب لبنته نص توب شيفتشي
جايب لبنته نص توب شيفتشي
الدنيا ضلمة في المعادي القديمة
وفي المعادي الجديدة والبساتين
وفي المعادي الجديدة والبساتين
يا بت خالك افندي وامه كريمة
وبنت عمك عايقة في الفساتين
وبنت عمك عايقة في الفساتين
وانا عندي حُجّة أني ابدأ قصايدي
زي اللي قبلي بالغزل والنسيب
زي اللي قبلي بالغزل والنسيب
وكل ما انوي أني أنصب مصايدي
القاني ما اعرف إلا مدح الحبيب
القاني ما اعرف إلا مدح الحبيب
صليت عليه الصبح ثم الضحى
وفضلت اصلي حتى وقت السَحَر
وفضلت اصلي حتى وقت السَحَر
وفضلت داير ويّا قطب الرحى
ساكن وبارقص رغم هذا الضَجَر
ساكن وبارقص رغم هذا الضَجَر
ما اعرفش راحة روحي هي الرحيل
ولّا الخلود وقت القلق للسكن
ولّا الخلود وقت القلق للسكن
والصح أوصف جرحي بالتفصيل
ولا كفاية إني اقول لك عدن
ولا كفاية إني اقول لك عدن
يا بت وصف الشعر للأطلال
حكمة حكيم مجروح في قلب العرب
حكمة حكيم مجروح في قلب العرب
شايف شتات الصُحبة والأخوال
غرقان ومتعلق بقشّة طرب
غرقان ومتعلق بقشّة طرب
شايف بكايا ع الكويت والعراق
قاعد يلملم حزن قلبي ف حلب
قاعد يلملم حزن قلبي ف حلب
وماشي م البستان لرملة بولاق
يبكي على الأحباب في نجع العرب
يبكي على الأحباب في نجع العرب
الدنيا كانت ضلمة عز الضُهر
والشمس ناقحة ف راسي مش داري
والشمس ناقحة ف راسي مش داري
ايه اللي خلى الفَجر زي الفُجر؟
جايز غياب الضمة والشاري
جايز غياب الضمة والشاري
طب هابكي ليبيا ولا أبكي الشام
ولا اليمن ولا ابكي مصر عتيقة
ولا اليمن ولا ابكي مصر عتيقة
واقول باحبك رغم مُر الملام
وامدح عيونك وابن عمي في ضيقة!
وامدح عيونك وابن عمي في ضيقة!
بس الخلاصة ان قلبي حزين
والشِعر مخنوق في حلقي هذه الأيام
والشِعر مخنوق في حلقي هذه الأيام
أصل الحقيقة إن فيه حبين
حُبك عطايا وحب وطني غرام
حُبك عطايا وحب وطني غرام
