أسامة أبو الليل
حديثي مع القلم
اكتب يا قلم اكتب قبل الاوان وحلول الندم
اوعي تكون عاجز زي الفكر والصوت والنغم
انت اللي باقي بعد المو ت والاحساس بالهرم
كل الحواس في العقل والوطن اتفرمت اة يا قلم
وانت بتكتب اياك تنسي اننا تعبنا من كتر النعم
اللي بنشوفها علي الشاشة ومش لمسينها فأرض العدم
واحكي بقوانين اعلام النخاسة والخيانة بل الزمم
وصراع الخسارة في العيشة والحلم وحرب القيم
والتحول ببجاحة وقوة علي راس الناس والامم
واصرخ يمكن تمنع اهل الفتن بيخربوا حتي بالقلم
كل حاجة وعكسها حسب الهوي تتحل وتنحرم
اشتروا الغالي بالرخيص وباعوا كل اصيل ومحترم
حتي العلم رقصوا علية اكتب دول شوية رمم
واللي واقف علي الحدود بينشتم وكمان مطلوب ينعدم
اكتب بالعقل ارسم بجنون قول رهان ! دايما هتنصدم
رقاص وغازية بيشرحوا الاخلاق وبيقبضوا بالرزم
هتسكت يا قلم! اكتب اصرخ ليهدوا .او يفسروا القيم
علي هوي اصحاب الهوي دة عبد الدايم بقي من القمم
وعواد بقي راجل! ومثل اعلي للشباب واصحاب الهمم
وبحبك يا حمار واللي سبكها ودغدغها قربت تبقي نشيد للعلم
وكهنة المعبد دايما ناجحين في الهيمنة وصنع الصنم
والخونة في انتظار فرصة لدبح وتفجير الوطن والعدم
واكتب كمان فية مصالح بتتصالح بتضيع الصالح والمحترم
واولاد الناس تايهين في البلد من كتر الاعيب الخدم
والرقص علي كل الحبال مهارة للاستمرار والا تنفرم
والعدل في بلادنا هتكتبها ازاي يا راجل! العدل اتظلم
وحماة الوطن فرض يضحوا باروحهم بمنتهي الكرم
وقول في الاوطان اة! والف اة بالخيانة بتنهزم
طيب دة اخر كلامك يا قلم لا دة بداية الوصف يا برم
كفاية كتابة يا قلم فية رب عظيم كريم رغم كل الالم
