العربي.... خويا
أحمد أنعنيعة
العربي.... خويا
العربي عنوان طويل لا من يقرا ليه
تكتبات على جبهته آثار الوحي وما داها فيه
ما جود قرآني..
ما بغا يجود معاه حناني
تيترفع معاه إلى السما ومن اللي تينزل تيطيح بلا بيه
يكتب حروف خلودو على رمالي
فقد كبدته وولى يأكل كبدة خوه
ولات خلاقو مذمومة
وحتى أنا اللي خوه بسهامو رماني
وزاد طول الله عمرو حتى ولى يأكل من ماعوني
انا في حقي كلاني وزاد حتى البراني
ولكن حتى واحد ما اسمع ليه
راه هذا هو العربي خويا اللي بفعايلو احتا أنا عاداني
وليت كل صباح بكري نوض نطل على النسيم
نطل عليه وأنا فيا وجع الوطن..
فيا فيض القلم..
وليت نلقاه يتكبر ...يلبس...ويتبهلل
ولى نجم ظالم..طاغية من الطغيان
بلا إحسان ..لا أمن...بلا إيمان
وكل الناس غير اخليقة من اخلايق الرحمان
بايتة الليالي وحدها تعاني
لا قراية تنفعهم ...ولا كلامهم فيه المعاني
وايييه...خرجت نشوف في ذاك الصباح اش طاري
لقيت الفوضى نايضة بالعلالي والخيل تشالي
هذا يجي يخدم بلا ما يكون قاري
خاص غير الكرش تكون عندو منفوخة بكثرة الغش
وهذا حالو بكاني
جالس يفني في شبابو...مكوي وصابر
هذا ساكت وسامر...وهذا مسكين واقف على المسامر...
وهذا حجر زمانو عياني
يا طوب الأرض ...يا العربي خويا
راه جرح الجلبة واعر
علاش تدير في الفعايل .. 40 سنة.. أش جالس تتحضر
وأنا كل صباح ..من السما نطيح في البحر
درت حتى عييت ...وباقي خوك زاوي.. تنعاني
لا مرضك منه تعافيت ولا أنت عايش حر بحالي
يا معدن الهم...اخويا العربي
راني ما ابقيت نعرف احد...ولا عليك خبيت شي سر
واش الحوت في البحر غافل
راه مرة في الكشاكش يطل ....ومرة في القاع حاتل
يبات يجري ويظل يجري...مرة يزرب ومرة يثقل
من هذا الصياد يهرب وعند الأخر في اشباكو حاصل
ها السر فين كاين ....ها القضية ...
وأنا بعيني نشهد على اللي عياني
شحال تمنيت يكون لي اخ نعاونو ويعاوني
نعطيه ميات الهدية...وهدية
نبغيه يتسلق العلالي
بلا تجارة ... بلا حزارة
ويولي الطين الجاري بيني وبينه عامر بر
وتولي الرملة المالحة عامرة ثمر
ويا ريت تكون عندي أخت تنوض تصلي الفجر
من الزريبة تغرف وتوفي ليا
وما تبقاش في الليالي تبات دور بلا صدر
وما يكون بحال العربي خويا...راه هذاك عدو غاشم...
يبات كيف النسر ينقب ويعاود ينقب بلا ما يشاور
وكل صباح تلقاه فايق من الرماد كيف الجمر
هذاك هو الشاهد على الهم والغذر..
واللي بغا يقلب عليه وجهو..راه يمكن يشوفو..
ولكن يرد بالو راه دايما هاز سيوفو
أما أنا فحطيت الرحل...من زمان وأنا تنتظر
