عَيَّل بلون الشجر
قُدَّام هَوَّا الخماسين
من هجمة الحصبه على بدنُه النحيف
لابس بيجامتُه الحمرا
و مرمي ف سريرُه
ناموسيَّه مشدوده على الآخر
حامياه من الكوابيس
من وقت ما اتنصبت
مقامش من نومُه الخفيف مفزوع
عيَّل بلون ضحكة مجامله
ف وش حد مُهِم أول مره بتقابلُه
برغم حُقن الكورتزون
عَمَّال بيلعب كوره ف الشارع
و بينقل العارضه من مكان لمكان
لما الجيران يغضبوا \ و يغَرَّقوا الملعب
عَيِّل بيشبهني
بيشبهني أوي
لكني بيني و بينُه فرق بسيط
( عيونُه أوسع من هدوم العيد )
و عيوني أضيق م السما لحظة دُعايَّا
بعد ما بَزَعَّل " آمال "
عيِّل بيشبهني
بيشبهني أوي
بس انا \ أنا ما اشبهوش
