كلمتى
..........
كلمتى ..
يا مالية الحشا
بالالم والخوف
متكتفه ..
فى بير كله حيرة
سنين وانا بغزلك
جناح
متفتكريش ..
ان جوا حدودى
كل البراح
جوايا انكسار
مصمصه فى شفايف
صابها الخرس
والحلم مدمن للكفن
بنمرر الاوجاع يوماتى
بنفس الجمل
الالسنة ..
تشجب ... تدين
نلزق قناع الوجع
فوق الوشوش
نعمل جروب
لنصر الاوليا
ندعو لحداد
ونقيم صلاة
والدم سايل ع السكك
مين اللى قال
الحق بيرجع بالدعا
أو بالمقاطعة
أو حتى بسنين صلاة
او حتى معاهدات الابالسة
طيب يلا نلحق
العرض الاخير
للفيلم الجديد
نعيد ف حكايات
الدراما المؤلمة
" يوووووووووو "
قطعوا المسلسل
" خبر عاجل "
( صواريخ بتاكل
جتت الملايكة
وجارى حصر
الاكفنة )
عدنا ..
خلينا يلا نشوف
باقى الحكاية
وخليكى جوه ما تخرجيش
يا كلمتى
