الشهيد عبد الرحمن
أحمد الفرحاتي
. إهداء لروح الشهيد البطل ابن المنصورة (عبد الرحمن) وللضابط قائد الكمين مع تمنياتنا له بالشفاء…………
.
.
أنا ذنبي إيه؟
وموتي دا ليه؟
تعبت في دراسة
وبعد الدراسة
في جيشي في حراسة
في صحبة زميل
برشاشي واقف
في حتة كمين
بلبسي الجميل
وكابي وبيادتي
صلاتي وعبادتي
ويا رب أعدي
وارجع سليم
وجات الرصاصة
في جنبي وصابتني
ورغم الآلام
حلفت ما هأهرب
ولازم أصيبهم
لو أمشي وأسيبهم
دى تبقي نجاسة
ولو حتى اموت
لآخر رصاصة
بمدفع في إيدي
هاقتل عدوي
وهاحمى التراب
وهافضل وراهم
ولاد الكلاب
واعد الضحايا
وضابط كميني
يعد معايا
واحد وخمسة
وعشرة وزيادة
لآخر رصاصة
لأجل الوطن
لأجل ترابك
يا مصر وسعادة
وعدين صابوني
وجتني رصاصة
ف راسي وقعت
دي راحة وسعادة
لأني أكيد
نلت الشهادة
وبأدعي لصحابي
وقائد كميني
وكل مصاب
يا رب بارك
واشفي الإصابة
واحقن دماء
ووحد صفوف
وصبر أبويا
وأمي وأخويا
وزيل الكآبة
وأبعد عنهم
يا رب خوف
.
